विदेशमा रहेका नेपालीलाई समेत स्वदेश फर्काएर रोजगारी दिने आश्वासनसहित चुनाव जितेर सरकारमा पुगेको पार्टी रास्वपाका एक स्थानीय नेता आँसु खसाल्दै मुग्लान भासिएका छन् ।  रास्वपा रोल्पाका नेता यसपाल घर्ती मगर रोजगारीका लागि दुबई उडेका हुन् । विदेश जानुअघि फेसबुकमा स्टाटस लेखेर उनले देशमा रोजगारीको सम्भावना नभएपछि यो निर्णय गर्नु परेको जानकारी गराएका थिए ।  रास्वपा त्रिवेणी गाउँपालिकाका सभापतिसमेत रहेका यसपाल गत फागुन २१ को निर्वाचनमा घन्टीको प्रचारमा मरिमेटेर खटिएका थिए । रास्वपा सभापति रवि लामिछानेको भाषण र प्रधानमन्त्री बालेन्द्र साहको 'क्रेज' ले अरूजस्तै लोभिएका उनलाई 'नयाँ' पार्टीको सरकार आए देशमै रोजगारी पाइने विश्वास थियो ।  रविले चुनावताका आफूहरू सरकारमा आएपछि पहिलो सय दिनमा कम्तिमा सय नेपालीलाई विदेशबाट फर्काएर स्वदेशमै जागिर दिने भाषण गरेका थिए । विदेशका गल्ली-गल्लीमा सूचना टाँस्न आफैँ पुग्ने पनि भनेका थिए । तर, पार्टीले सत्ता सम्हालेको लामो समयसम्म त्यस्तो कुनै छाँट नदेखेपछि यसपाल निराश थिए ।  एकातिर देशभित्र रोजगारीको अवसर नहुनु, अर्कोतिर आर्थिक अवस्था कमजोर बन्दै गएपछि उनी विदेशिने सोचमा पुगे । पछिल्लो समय त उनी देशको राजनीतिप्रति पनि दिक्क हुन थालेका थिए ।  प्रधानमन्त्री बालेन्द्र र गृहमन्त्री सुधन गुरुङकाे कार्यशैलीप्रति दिक्क मान्दै साथीभाइसँग भन्ने गर्थे- 'याे राजनीति हामीजस्तो मान्छेले गर्ने चिज होइन रहेछ । मलाई अहिले बल्ल फिल हुँदैछ । सायद, खाडीतिर जान्छु हाेला ।' त्यसको केही दिनमै फेसबुकमा 'रहर र बाध्यता सँगै' लेखेर यसपाल दुबई उडेका हुन्

( जन आस्था बाट साभार )